Рӯзи 14-уми апрел дар Театри академии опера ва балети ба номи Садриддин Айнӣ маросими ифтитоҳи Ҷашнвора-озмуни саросарии театрҳои касбӣ – «Парасту 2025» баргузор гардид.
Матлубахон Сатториён, вазири фарҳанги Тоҷикистон дар ҳангоми суханронӣ иброз дошт, ки ҷашнвораи мазкур ба манзури пешрафти намоишноманависӣ ва театри миллӣ, эҷод ва пешниҳоди асарҳои баландмазмуни ватанӣ, ҳунарафзоии коргардонҳо, кашфи ҳунармандон ва рассомони боистеъдод сурат мегирад.
Таъкид шуд, ки ҷашнвораи «Парасту»-ро коршиносон дар дар бахшҳои гуногун аз Тоҷикистон, Узбекистон, Қазоқистон ва Русия доварӣ мекунанд.
Дар идома намоиши «Куруши Кабир»-и Намоишсарои Садриддин Айнӣ бо коргардонии Аяна Аскинбоева рӯйи саҳна гузошта шуд.
Бояд гуфт, Ҷашнвора-озмуни саросарии театрҳои касбӣ – «Парасту» доиман буда, дар ду сол як бор бо ширкати намоишсароҳои касбии Тоҷикистон барпо мегардад.
Имсол он то 21-уми апрел идома карда, 18 театр намоишҳоеро рӯйи саҳна мегузаронанд, ки дар давоми солҳои 2023-2024 эҷод кардаанд.
