4-уми феврал дар Муассисаи давлатии “Тоҷикфилм” нишасти матбуотӣ доир гардид. Зимни ироаи ҳисоботи солона директори муассиса Маҳмадсаид Шоҳиён иброз дошт, ки соли 2024 барои синамои ватанӣ соли пурбарор буд. Дар баробари сабти чанд филми ҳунарӣ масъулин дар доираи баргузории синамоҷашнвораи миллии “Тоҷи сомон” чанд созишнома бо синамосозони ҷумҳуриҳои мухталиф ба имзо расонданд.
– Ин ҳамкориҳо метавонанд барои пешрафти филмҳои ватанӣ имконоти васеътарро ба миён оваранд, – таъкид кард номбурда.
Ба иттилои Шоҳиён, дар соли 2024 филмҳои “Зиндагӣ зебост” (коргардон Далер Раҳматов), “Дар талоши ҳақиқат” (коргардон Манзаралӣ Шералӣ), “Танҳо ту” (коргардон Умедшо Мирзоширинов) ва “Виҷдон” (коргардон Соҳибёр Толибов) пешниҳоди бинанда гардиданд. Номбурда ҳамчунин зикр намуд, ки дар муассиса ташкили питчингҳо ба ҳукми анъана даромадааст ва лоиҳаҳои беҳтарин маҳз тавассути онҳо муаррифӣ ва ба шурои адабии киностудия пешниҳод мешаванд. Дар моҳи аввали соли ҷорӣ тавассути питчинг ду филмномаи арзишманд ба даст омад, ки ҳоло мавриди омӯзиш ва барассии ҳайати мушовара қарор дорад.
Мижгона ХАЛИЛЗОДА,
“АС”
