Дар шаҳри Теҳрон – пойтахти Эрон рӯзи 20-уми май шаби шеъри Гулрухсор Сафӣ, Шоири халқии Тоҷикистон таҳти унвони “Танҳотар аз танҳоӣ” баргузор шуд. Дар ин бора ба adab.tj Зебо Ишроқӣ, ровии ин маҳфил хабар дод.
Тибқи иттилоъи ин манбаъ, дар маросими мазкур намояндагони Сафорати Тоҷикистон дар Эрон, аҳли адаб ва алоқамандони каломи бадеъ ҳузур ёфтанд.
Гуфта мешавад, Қаҳрамон Сулаймонӣ, раиси пешини Ройзании фарҳангии Эрон дар Душанбе дар бораи ҷойгоҳи Гулрухсор Сафӣ дар Тоҷикистон ва замону рӯзгори муҳими миллати тоҷик суханронӣ кард.
Дар идома адабпажӯҳ Соиди Боқӣ умумият ва тафовути шеъри Гулрухсор ва Нимо Юшиҷро ба баррасӣ гирифта, талошҳои онҳоро барои дастёбӣ ба қолабҳои нав муҳим арзёбӣ кард. Аз ҷумла таъкид шуд, ки дар натиҷаи ин озмоишҳо Нимо ба шеъри нимоӣ расид ва Гулрухсор дар заминаи ин қолабҳо ғазалу қитъа суруд.
Ин манбаъ меафзояд, ки меҳрбону Гулрухсор дар шоми шеъраш аз нахустин дидораш бо гурӯҳи адибони Эрон – Ахавони Солис, Ҳушанг Гулшерӣ, Маҳмуди Давлатободӣ, Симини Беҳбаҳонӣ, Бузурги Алавӣ ва дигарон дар Олмони Ғарбӣ ёдоварӣ кард.
Ҳамчунин дар маҳфили мазкур шоири эронӣ Абдуҷаббор Кокоӣ шеъри “Сафари Тоҷикистон”-ашро пешкаши ҳозирин гардонид. Се шоири ҷавон ва ҳамзамон аъзои Хонаи шоирони Эрон низ шеър хонданд.
Дар поёни ин маҳфили адабӣ як ҳунарманди хушнавис нигораи шеъри “Шоҳнома Ватан аст”-и Гулрухсорро ба вай тақдим кард.
Гуфтанист, созмондеҳони ин маҳфил Хонаи шеъри Эрон, Анҷумани шоирони ин кишвар ва Дафтари шоирони ҷавон шумурда мешаванд.
Гулрухсор Сафӣ шахсияти адабию сиёсии Тоҷикистон буда, бо эҷоди ашъори ошиқона ва ҳолат, насри андеша ва мавзеъгириҳояш дар ҷомеъаи форсизабон шинохта шудааст.
